လူသစ်/MFP ၊အောက်တိုဘာ-၄
အာဏာသိမ်းစစ်ခေါင်းဆောင် မင်းအောင်လှိုင် တည်းခိုနေတဲ့ အလယ်ပိုင်းတိုင်းစစ်ဌာနချုပ်ကို အောက်တ်ိုဘာလ ၄ ရက် ဒီနေ့မနက် ၆ နာရီမှာ Brave Warriors For Myanmar (BWM) အဖွဲ့က ရှော့တိုက်ဒုံး နှစ်လုံးပစ်ခတ်ခဲ့ပြီးနောက် ဖမ်းဆီးစစ်ဆေးတာတွေ ပိုက်စိပ်တိုက် လုပ်ဆောင်နေတယ်လို့ မြို့ခံတွေကပြောပါတယ်။
ပြင်ဦးလွင်ကနေ မန္တလေးကို စစ်ခေါင်းဆောင်မင်းအောင်လှိုင်ဟာ မန္တလေးတက္ကသိုလ်ရာပြည့်ပွဲကို တက်ရောက်ဖို့ မနေ့က ရောက်ရှိနေတာ ဖြစ်ပြီး အလယ်ပိုင်းတိုင်းစစ်ဌာနချုပ်မှာ ခေတ္တတည်းခိုနေချိန်မှာ ရှော့တိုက်ဒုံးနဲ့ ပစ်ခတ်ခံရတာ ဖြစ်ပါတယ်။
ရှော့တိုက်ဒုံးတွေ ပစ်ခတ်ခဲ့တဲ့ BWM အဖွဲ့ရဲ့တာဝန်ရှိသူတစ်ဦးကတော့ ပစ်ခတ်မှုဆောင်ရွက်ပြီးနောက် အထိအခိုက်မရှိဘဲ နောက်ပြန်ဆုတ်လာနိုင်တယ်လို့ MFP ကို ပြောပါတယ်။
“ပစ်ခတ်ပြီး မကြာခင် လေယာဥ်နဲ့ပါတ်ရှာပါတယ်။ Mi 35 တောက်လျောက် ပတ်ရှာတယ်။ ပြီးမှ Y12 ပါတက်လာပြီး ရှာတယ်။ ဒါပေမယ့်ရဲဘော်အားလုံးဘေးကင်းစွာဆုတ်ခွာနိုင်ခဲ့ပါတယ်”
စစ်ခေါင်းဆောင်အနေနဲ့ ပြည်သူလူထုကို လူသားဒိုင်းအဖြစ် အကာအကွယ်ယူပြီးနောက် ပွဲတက်ခဲ့ပေမဲ့ လူထုတွေရှိနေတာကြောင့် အခမ်းအနားကို မတိုက်ခိုက်ဘဲ လူထုထိခိုက်မှုမရှိတဲ့ ခေတ္တတည်းခိုနေတဲ့ အလယ်ပိုင်းတိုင်း စစ်ဌာနချုပ်ကို တိုက်ခိုက်ခဲ့တာလို့ ဆိုပါတယ်။
ရှော့တိုက်ဒုံးကျရောက် ပေါက်ကွဲမှုကြောင့် ထိခိုက်သေဆုံးတဲ့ အခြေအနေအသေးစိတ်ကို မသိရသေးပေမဲ့ မန္တလေးမြို့မှာ လုံခြုံရေးနှစ်ဆတိုးချထားပြီး လေကြောင်းကနေပါ ရဟတ်ယာဉ်နှစ်စီးနဲ့ ရှာဖွေစောင့်ကြည့်နေသလို မြေပြင်မှာ လမ်းသွားလမ်းလာတွေကို စစ်ဆေးမေးမြန်းတာတွေ လုပ်နေတယ်လို့ မြို့ခံတွေက ပြောပါတယ်။
“တက္ကသိုလ်ဘက်ကို ဆိုင်ကယ်လုံးဝသွားလို့မရဘူး။ မနက်ကတည်းကနေ ပိတ်ထားတာ။ ပွိုင့်တိုင်းမှာလည်း ရဲရောစစ်အုပ်စုရော အနည်းဆုံး ခြောက်ယောက်လောက် တွေ့တယ်။ ပုံမှန်မရှိတဲ့ နေရာတွေမှာတောင် တွေ့နေတယ်။ မနက်ကတော့ ကျွန်တော်က ဈေးကြိုဖို့သွားရင်းလမ်းမှာဆိုတော့ အုန်းခနဲ တစ်ချက်ကြားလိုက်တယ်။ အခုထပ်ကြားတာတော့ ဆိုင်ကယ်တွေကို ဖမ်းပြီးစစ်နေတယ်တဲ့။ အိမ်စီးကားတွေနဲ့ရော စစ်ကားတွေရော ပတ်နေတာ မနက်ကပစ်တဲ့ ကိစ္စကိုတရားခံရှာဖို့ လုပ်နေတာ ဖြစ်မယ်”
လက်ရှိမှာတော့ စစ်ခေါင်းဆောင် မင်းအောင်လှိုင်ဟာ ဒီနေ့မနက်ပိုင်းမှာ တက္ကသိုလ်ရာပြည့်ပွဲကနေ မိန့်ခွန်းပြောကြားပြီးနောက် ပြန်လည် ထွက်ခွာသွားပြီလို့ ဆိုပါတယ်။
စစ်ခေါင်းဆောင် ခရီးစဉ်မှာ ရှော့တိုက်ဒုံးပစ်ခတ်ခံရတာကြောင့် စစ်အုပ်စုအနေနဲ့ မြို့ခံလူငယ်တွေကို ဖမ်းဆီးစစ်ဆေးတာတွေ လုပ်ဆောင်လာနိုင်တာကြောင့် စိုးရိမ်မှုတွေရှိနေတယ်လို့ မြို့ခံတွေက ဆိုကြပါတယ်။
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
