MN/MFP ၊ ဒီဇင်ဘာ – ၂၈
စစ်ကိုင်းတိုင်း၊ မြို့တော်မုံရွာမှာ ဒီဇင်ဘာ ၂၈ ရက် ဒီကနေ့မှာ စစ်အုပ်စုဦးဆောင်ကျင်းပတဲ့ ရွေးကောက်ပွဲလုပ်နေချိန်မှာပဲ နယ်မြေချင်းထိစပ်နေတဲ့ ဘုတလင်နယ်ကို လေကြောင်းတိုက်ခိုက်မှု ၁၀ ကြိမ်ထက်မနည်း လုပ်ခဲ့တယ်လို့ ဒေသခံ သတင်းရင်းမြစ်တွေက ပြောပါတယ်။
စစ်အုပ်စုတပ်ဟာ ရွေးကောက်ပွဲမကျင်းပခင် တစ်ရက်အလိုထဲက မုံရွာ-ဘုတလင်လမ်းပိုင်းကို ဖြတ်သန်းသွားလာခွင့်ပိတ်ကာ မြို့ပေါ်မှာလည်း လုံခြုံရေးတင်းကြပ်ထားတယ်လို့ ဆိုပါတယ်။
အနောက်မြောက်တိုင်းစစ်ဌာနချုပ် အခြေစိုက်ထားတဲ့ မုံရွာမြို့နဲ့ ၁၁ မိုင်ကျော်အကွာမှာရှိနေတဲ့ ဘုတလင်မြို့နယ်ဟာ ရွေးကောက်ပွဲကျင်းပနိုင်ခြင်းမရှိသလို လတ်တလောမှာလည်း တိုက်ပွဲတွေဆက်ရှိနေတာ ဖြစ်ပါတယ်။
စစ်အုပ်စုက ဒီကနေ့ ဒီဇင်ဘာ ၂၈ ရက် မနက် ၇ နာရီ ဝန်းကျင်ကစပြီး နေ့လယ် ၁၂ နာရီအထိ Y-12 ဘက်စုံသုံးလေယာဉ်နဲ့ ခုနစ်ကြိမ်၊ ပါရာမိုတာနဲ့ ဂျိုင်ရိုကော်ပတာတွေနဲ့ ခြောက်ကြိမ် လေကြောင်းက ဗုံးကြဲတိုက်ခိုက်ခဲ့တယ်လို့ မြေပြင်သတင်းရင်းမြစ်ကဆိုပါတယ်။
“မနက်ကတည်းက လေကြောင်းကနေ ဗုံးသီးတွေ ချနေတာ။ Y-12 နဲ့က ခုနစ်ကြိမ် ပါရာမိုတာနဲ့က ခြောက်ကြိမ်ရှိသွားပြီ။ မနက်က တိုက်ပွဲလည်းဖြစ်လိုက်သေးတယ်။ လေကြောင်းဗုံးကြတာက ပြည်သူထိခိုက်တာတော့ မကြားရသေးဘူး။ တိုက်ပွဲရှိနေသေးတော့ အသေးစိတ်ဘာမှ ပြောလို့မရသေးဘူး”
ဘုတလင်နယ်ထဲကို စစ်အုပ်စု လေကြောင်းကနေ ဗုံးကြဲတိုက်ခိုက်နေသလို မနက်ပိုင်းကလည်း မုံရွာမြို့နယ် ကျောက်စစ်ပုံရွာအနီးက စစ်အုပ်စုရဲ့ အမှတ် – ၅၀၈ အမြောက်တပ်နဲ့ အရာတော်မြို့နယ်ထဲက စစ်အုပ်စုရဲ့ အမှတ် – ၁၀ စစ်အခြေခံလေ့ကျင်းရေးတပ်ကနေပါ လက်နက်ကြီးတွေနဲ့ ပစ်ခတ်ခဲ့တယ်လို့ ဒေသခံတွေက ပြောပါတယ်။
လေကြောင်းနဲ့လက်နက်ကြီး ပစ်ခတ်မှုတွေကြောင့် ဘုတလင်မြို့နယ်မှာ အရပ်သားတွေ ထိခိုက်သေဆုံးတာတွေရှိပေမဲ့ MFPအနေနဲ့ သီးခြားအတည်မပြုနိုင်သေးပါဘူး။
ဒါ့အပြင် ဘုတလင်နယ်ထဲမှာ အင်အားငါးဆယ်ကျော်ပါတဲ့ စစ်အုပ်စုစစ်ကြောင်းက မြေပြင်စစ်ကြောင်းထိုးနေသလို တော်လှန်ရေးပူးပေါင်းတပ်ဖွဲ့တွေနဲ့ပါ ဒီနေ့မနက်ပိုင်းမှာ ထိတွေ့တိုက်ပွဲ ဖြစ်ပွားခဲ့တယ်လို့ ဆိုပါတယ်။
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
