Paramotor (စက်တပ်လေထီး) အသုံးပြု ဗုံးကြဲတိုက်ခိုက်ခံရမှု ကာကွယ်ရန် နည်းလမ်းများ
အာဏာသိမ်း စစ်အုပ်စုဟာ ၂၀၂၄ နှစ်ကုန်ပိုင်းက စလို့ မြန်မာနိုင်ငံ နေရာအနှံ့အပြားကို Paramotor (စက်တပ်လေထီး)တွေ အသုံးပြုပြီး ဗုံးကြဲတိုက်ခိုက်တာတွေ ပြုလုပ်နေပါတယ်။ အထူးသဖြင့် စက်တပ်လေထီး ကို တုန့်ပြန် တိုက်ခိုက်နိုင်တဲ့ လက်နက်အင်အား အားနည်းတဲ့ အညာဒေသ မန္တလေး၊ စစ်ကိုင်းနဲ့ မကွေးတိုင်းထဲ ပိုမို ပစ်မှတ်ထား တိုက်ခိုက်နေတာပါ။
ဒါကြောင့် စက်တပ်လေထီး အသုံးပြု ဗုံးကြဲတိုက်ခိုက်မှုတွေကို ကာကွယ်နိုင်ဖို့ အကြံပြုချက်တချို့ကို မျှဝေ လိုက်ပါတယ်။
Paramotor – စက်တပ်လေထီး ဆိုတာဘာလဲ
Paramotor ဆိုတာ လေထီးနဲ့ စက်အင်ဂျင်ကို ပေါင်းစပ်ပြီး ရွေ့လျားပျံသန်းနိုင်အောင် ပြုလုပ်ထားတဲ့ ယာဉ် အမျိုးအစား ဖြစ်ပါတယ်။ စက်တပ်လေထီးဟာ လွယ်ကူစွာ စီးနင်းပျံသန်းနိုင်တဲ့အပြင် အခြား အားသာချက်တွေ လည်း ရှိပါတယ်။
စက်တပ်လေထီးရဲ့ ပုံသဏ္ဌာန်၊ အလုပ်လုပ်ပုံနဲ့ အားသာချက်တွေ
အဝေးကကြည့်လျင် ရိုးရိုး လေထီးနဲ့ ဆင်တူပါတယ်။ လေထီးကို အသုံးပြုပြီး စီးနင်းသူရဲ့ ကျောကုန်းမှာ ကျောပိုးအိတ် ပုံစံ စက်အင်ဂျင် တပ်ဆင်ထားပါတယ်။ အင်ဂျင်က ထုတ်လုပ်တဲ့ စွမ်းအင်နဲ့ လေထဲမှာ ရွေ့လျားနိုင်အောင် ဒလက်ပန်ကာတွေ အသုံးပြုထားပါတယ်။
Paramotor ကို အသုံးပြုပျံသန်းနိုင်ဖို့ အချိန်အနည်းငယ်အတွင်း လေ့ကျင့်သင်ကြားနိုင်ပါတယ်။
ကွင်းပြင်လို နေရာမျိုးကနေ စတင်ပျံသန်းနိုင်ပါတယ်။
သတိထားရမည့် အချက်တွေ
စက်တပ်လေထီးဟာ ပင်လယ်ရေမျက်နှာပြင်အထက် အမြင့်ပေ ၁၈,၀၀၀ အထိ၊ မြန်နှုန်းအားဖြင့် တစ်နာရီ မိုင် ၆၀ နီးပါးအထိ ပျံသန်းနိုင်ပါတယ်။ ဒါကြောင့် မျှော်လင့်မထားတဲ့ နေရာတွေကနေ ရုတ်တရက် ပေါ်ထွက် တိုက်ခိုက်နိုင်ပါတယ်။
လေထီး အရွယ်အစားပေါ်မူတည်ပြီး ကီလိုဂရမ် ၂၄၀ (၁တန်= ၁၀၀၀ ကီလိုဂရမ်) အထိ သယ်ဆောင် နိုင်တာကြောင့် လက်ပစ်ဗုံးငယ်တွေ သာမက အမြောက်ဆံတွေအထိ သယ်ဆောင်နိုင်ပါတယ်။
ဒါတွေကို လိုက်နာပါ
စက်တပ်လေထီးဟာ စက်အင်ဂျင်အသံ ကျယ်လောင်တာကြောင့် မြင်နိုင်တဲ့ အကွာအဝေး မရောက်ခင်မှာပင် စက်သံကို သတိထားမိနိုင်ပါတယ်။ ဒါ့ကြောင့် အင်ဂျင်စက်သံ/ ပန်ကာ (ဒလက်) အသံ ကြားလျင် ပတ်ဝန်းကျင်ကို လေ့လာပါ။
တစ်နာရီ မိုင် (၆၀) နီးပါးအထိ မြန်ဆန်တာကြောင့် ထင်မှတ်မထားတဲ့ နေရာတွေကို ရုတ်တရက် အလျင်အမြန် တိုက်ခိုက်လာနိုင်တာကို သတိပြုပါ။
စက်တပ်လေထီး (ဒါမှမဟုတ်) လေထီးကို မြင်ပါက ဒါမှမဟုတ် အန္တရာယ် သတိပေးချက် ရလျင်ရချင်း အခိုင်အမာ တည်ဆောက်ထားတဲ့ ဗုံးခိုကျင်းထဲ ပုန်းခိုပါ။
ကျေးရွာတွေ၊ လူထူထပ်တဲ့ နေရာတွေနဲ့ စစ်ရေးအခြေစိုက် စခန်းတွေကို ဦးတည် တိုက်ခိုက်နိုင်တာကြောင့် အဲ့ဒီလို နေရာတွေကို သတိပြုရှောင်ရှားပါ။
ကိုးကား – Paramotor Specifications, Military Use of Paramotors
