နတ်ရေကန်လေကြောင်းရန် ကာကွယ်ရေးစခန်းက ရေဒါကို စစ်အုပ်စု ဖြုတ်သိမ်းရွှေ့ပြောင်းထား 

သက်တန့်/MFP ၊ အောက်တိုဘာ – ၁၆

မကွေးတိုင်း၊ ငဖဲမြို့နယ်အတွင်းက နတ်ရေကန်လေကြောင်းရန် ကာကွယ်ရေးအထိုင်စခန်းက P-18 Early Warning Radar အမျိုးအစားရေဒါကို စစ်အုပ်စုတပ်က ဖြုတ်သိမ်းရွှေ့ပြောင်းထားတယ်လို့ မြန်မာ့စစ်ဘက်ရေးရာနဲ့လုံခြုံရေးဆိုင်ရာအဖွဲ့(Myanmar Defense&Security Institute – MDSI)က အောက်တိုဘာလ ၁၆ ရက်မှာ ထုတ်ပြန်ပါတယ်။

အာရက္ခတပ်တော်နဲ့ တော်လှန်ရေးအင်အားစုတွေက နတ်ရေကန်စခန်းကို သိမ်းပိုက်နိုင်ဖို့ ဆက်တိုက်ထိုးစစ်ဆင်နေချိန်မှာပဲ စစ်အုပ်စုက ရေဒါကို အခုနှစ်ဖေဖော်ဝါရီလမှာ ဖြုတ်သိမ်းခဲ့တာလို့ ထုတ်ပြန်ချက်မှာ ရေးသားထားပါတယ်။

အဲဒီရေဒါဟာ ရခိုင်ပြည်နယ်စပ် ဘင်္ဂလားဒေရှ်နိုင်ငံရဲ့ လေကြောင်းလှုပ်ရှားမှုတွေကို စောင့်ကြည့် ထောက်လှမ်းနိုင်ဖို့အတွက် တပ်ဆင်ထားတာဖြစ်ပြီး  ကြိတင်သတိပေးတဲ့ ရေဒါစနစ်ဖြစ်တာကြောင့် အကွာအဝေး ကီလိုမီတာ ၂၅၀ အထိ စောင့်ကြည့်ထောက်လှမ်း နိုင်တယ်လို့ ဆိုပါတယ်။

ရိုးမပေါ်က နတ်ရေကန်တောင်ထိပ်မှာ စိုထိုင်းစမြင့်မားတာကြောင့် ကာလကြာရှည်လာတာနဲ့အမျှ ရေဒါမပျက်စီးအောင်  ကာကွယ်ဖို့အတွက် ကမ္ဘာလုံးပုံစံ မြူကာနစ်နဲ့ ထားရှိခြင်းဖြစ်တယ်လို့ ဖော်ပြပါတယ်။

ဒါ့အပြင် နတ်ရေကန်စခန်းကို အပြီးသတ်သိမ်းယူနိုင်ဖို့ လက်ကျန်စခန်းတချို့ကို ဆက်လက် ထိုးစစ်ဆင်တိုက်ခိုက်နေတယ်လို့ အာရက္ခတပ်တော် က AA အောက်တိုဘာလ ၁၆ ရက် ဒီကနေ့ ထုတ်ပြန်ထားပါတယ်။ 

နတ်ရေကန်စခန်းကို တိုက်ခိုက်ရာမှာ စခန်းကုန်းကနေ ဖရိုဖရဲထွက်ပြေးသွားတဲ့ စစ်အုပ်စုအဖွဲ့တွေနဲ့လည်း နေရာတချို့မှာ တိုက်ပွဲဆက်လက်ဖြစ်ပွားနေသလို စခန်းကုန်းကနေ ထွက်ပြေးလာတဲ့ လက်နက်ချ အညံ့ခံသူတွေကိုလည်း စစ်သုံ့ပန်းဥပဒေနဲ့အညီ စောင့်ရှောက်ထားတယ်လို့ ဆိုပါတယ်။ 

နတ်ရေကန်ကို ထိုးဖောက်ဝင်ရောက်နိုင်တဲ့ ဗစည်ရွာလမ်းဟောင်းနဲ့ ဂုတ်ကြီးရွာလမ်းသစ်ပေါ်က လုံခြုံရေးအထပ်ထပ်ချထားတဲ့ စစ်အုပ်စုရဲ့ကာကင်းစခန်းတွေကို အောက်တိုဘာလ အစောပိုင်းကတည်းက အာရက္ခတပ်တော်နဲ့ တော်လှန်ရေးပူးပေါင်းအင်အားစုတွေက တိုက်ခိုက်သိမ်းပိုက်လိုက်နိုင်ခဲ့တာ ဖြစ်ပါတယ်။

ဒါ့ကြောင့် လမ်းဟောင်းနဲ့ လမ်းသစ်ပေါ်က စစ်အုပ်စုစခန်းတွေအားလုံးကို သိမ်းပိုက်လိုက်တာဟာ နတ်ရေကုန်လေကြောင်းရန်ကာကွယ်ရေးစခန်းကိုပါ တစ်ပါတည်း ဝိုင်းပတ်ပိတ်ဆို့ထားနိုင်တဲ့ အခြေအနေရောက်သွားသလို စခန်းသိမ်းတိုက်ပွဲအတွက် တော်လှန်ရေးအင်အားစုတွေက ဆက်လက်ထိုးစစ်ဆင်နေလို့ တိုက်ပွဲပြင်းထန်နေဆဲဖြစ်တယ်လို့ စစ်ရေးသတင်းရင်းမြစ်တစ်ဦးက ဆိုပါတယ်။

နတ်ရေကန်စခန်းဟာ အာရက္ခတပ်တော်နဲ့ တော်လှန်ရေးအင်အားစုတွေအတွက် မကွေးတိုင်းကို ထိုးစစ်ဆင်နိုင်ဖို့ အကြီးဆုံးနဲ့ စစ်ရေးအရ ဗျူဟာအကျဆုံးဖြစ်သလို စစ်သည်အင်အား ၁၀၀၀ ဝန်းကျင်နဲ့ အထိုင်ချထားတဲ့ ရိုးမပေါ်က လေကြောင်းရန်ကာကွယ်ရေး စခန်းကြီးဖြစ်တယ်လို့ တော်လှန်ရေးအင်အားစုတွေက ပြောထားပါတယ်။

စစ်အုပ်စုကလည်း နတ်ရေကန်စခန်းကို လက်မလွှတ်ရဖို့အတွက် လေကြာင်းထိုးစစ်တွေပါ အသုံးပြုနေပြီး နေ့ညမရွေးဗုံးကြဲကာအရေး ခုခံကာကွယ်နေတယ်လို့ စစ်ရေးသတင်းရင်းမြစ်တစ်ဦးက ဆိုပါတယ်။

MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။