လူသစ်/MFP ၊ အောက်တိုဘာ – ၂၆
မကွေးတိုင်း၊ ဂန့်ဂေါခရိုင်၊ ယောဒေသ၊ ဆောမြို့မှာ အသက် ၁၃ နှစ်အရွယ် မိန်းကလေးတစ်ဦးကို အဓမ္မပြုကျင့်ပြီးနောက် သတ်ဖြတ်ကာ အလောင်းဖျောက်ဖျက်ခဲ့တဲ့ အမျိုးသားတစ်ဦးကို အောက်တိုဘာလ ၂၅ ရက်မှာ တော်လှန်ရေးတပ်ဖွဲ့က ဖမ်းဆီးရမိထားတယ်လို့ ဒေသခံတွေက ပြောပါတယ်။
မိန်းကလေးငယ်ကို သတ်ဖြတ်ပြီး အလောင်းဖျောက်ဖျက်မှု ကျုးလွန်သူဟာ အသက် ၂၁ နှစ်အရွယ် ကိုမင်းမင်းစိုး ဖြစ်ပြီး သူ့ကို ဒေသအခြေစိုက် ကာကွယ်ရေးတပ်ဖွဲ့တွေက အောက်တိုဘာလ ၂၅ ရက် ညနေပိုင်းက ဖမ်းဆီးထိန်းသိမ်းလိုက်တာလို့ အမည်မဖော်လ်ိုတဲ့ ဒေသခံတစ်ဦးက ပြောပါတယ်။
အောက်တိုဘာလ ၂၁ ရက်က ဆောမြို့၊ သီရိရပ်ကွက်မှာနေထိုင်တဲ့ အသက် ၁၃ နှစ်အရွယ် မအေးငြိမ်လင်းကို မုန့်ဝယ်ကျွေးဖို့ အကြောင်းပြချက်နဲ့ ကိုမင်းမင်းစိုးက ခေါ်ဆောင်သွားပြီးနောက် အဓမ္မပြုကျင့် သတ်ဖြတ်ကာ အလောင်းကို ဆောမြို့ ဆေးရုံဝန်းထဲက အဆောင်အဟောင်းထဲမှာ စွန့်ပစ်ဖျောက်ဖျက်ခဲ့တာလို့ ဆိုပါတယ်။
သမီးဖြစ်သူ အချိန်မီပြန်မရောက်လို့ မိဘတွေနဲ့ မိတ်ဆွေတွေက လိုက်လံရှာဖွေခဲ့ပေမဲ့ ခေါ်ဆောင်သွားသူနဲ့ ကလေးငယ်ကိုပါ မတွေ့ဘဲ ငါးရက်အကြာမှာ သေဆုံးပုပ်ပွနေတဲ့ သမီးဖြစ်သူရဲ့ ရုပ်အလောင်းကို တွေ့ခဲ့ရတာလို့ ဒေသခံက ပြောပါတယ်။
“ကလေးကို မုန့်ဝယ်ကျွေးမယ်ဆိုပြီး ဆိုင်ကယ်နဲ့ လာခေါ်သွားတာ။ ဒီကောင်နဲ့ မိဘတွေကလည်း သိတော့ ယုံယုံကြည်ကြည် ထည့်လိုက်မိတာပေါ့။ နောက်နှစ်ယောက်လုံးကို မတွေ့တော့ တခုခုဖြစ်နေပြီလို့ ထင်ကြတယ်။ ကလေးကလည်း ပျောက်နေတယ်။ ပြီးတော့ ဆေးရုံဝန်းဘက်ကလည်း ပုပ်နံ့က တနေ့ထက်တနေ့ ထွက်လာတာ။ ခွေးသေတယ်ပဲ ထင်ကြတာ။ ဒါနဲ့ပဲ စပ်စပ်စုစုရှိတဲ့ လူတစ်ယောက်က ပိတ်ထားတဲ့ အဆောင်ထဲ ဝင်ရှာမှ ကလေးရဲ့ရုပ်အလောင်းကို တွေ့တာ။ တွေ့တဲ့အချိန်မှာ ကလေးက ပုပ်နေပြီ။ ဒါပေမဲ့ လည်ပင်းနဲ့ ရင်ဘတ်မှာ အညိုအမည်းစွဲနေတာရယ်။ ခါးအောက်ပိုင်းနေရာက သွေးတွေထွက်ပြီး သွေးတွေက ခြောက်ကပ်နေတဲ့ ပုံစံတွေ့တယ်”
ကလေးငယ်ရဲ့ ရုပ်အလောင်းကို ဆေးရုံအဆောင်ပျက်ထဲက ကုတင်အောက်မှာ မိုးကာစတွေအုပ်ပြီး ထားရှိခဲ့တာကြောင့် အဓမ္မကျူးလွန်ပြီးနောက် နေရာမှာတင် သတ်ဖြတ်ခဲ့ပုံရတယ်လို့ သူက ဆိုပါတယ်။
ဖမ်းဆီးခံရချိန် မင်းမင်းစိုး ကိုယ်တိုင်က အဓမ္မပြုကျင့် သတ်ဖြတ်မှု ကျူးလွန်ခဲ့ကြောင်း ဒေသအခြေစိုက်ကာကွယ်ရေးတပ်တွေရှေ့မှာ ဝန်ခံထွက်ဆိုထားတယ်လို့ နီးစပ်သူ ဒေသခံတွေက ပြောပါတယ်။
အဲ့ဒီ ဖြစ်စဉ်နဲ့ပတ်သက်ပြီး ဘယ်သူက ဘယ်လို စီရင်မယ်ဆိုတာကိုတော့ MFP အနေနဲ့ မသိရသေးပါဘူး။
ဆောမြို့မှာ ကလေးသူငယ်ကို အဓမ္မပြုကျင့် သတ်ဖြတ်ခဲ့သူ အမျိုးသားကို တော်လှန်ရေးတပ်တွေက ဖမ်းမိထားစဉ်/Photo – ယောအလင်းတန်း
