အီသာရမ်/MFP ၊အောက်တိုဘာ-၇
စစ်အုပ်စုက သီတင်းကျွတ်လပြည့်နေ့မှာ မြို့ပေါ်တွေမှာ ပျော်ပွဲရွှင်ပွဲတွေ ပြုလုပ်ပေးနေပြီး တော်လှန်ရေးတပ်တွေ ထိန်းချုပ်ထားတဲ့ နေရာတော်တော်များများကို လေကြောင်းကနေ ဗုံးကြဲသတ်ဖြတ်ခဲ့တာကြောင့် ပြည်သူ ၄၀ ကျော် သေဆုံးခဲ့တယ်လို့ ဒေသခံသတင်းရင်းမြစ်တွေက ပြောပါတယ်။
အောက်တိုဘာလ ၆ ရက်နေ့ သီတင်းကျွတ်လပြည့်နေ့ တစ်ရက်တည်းမှာပဲ မုံရွာမြို့နယ်၊သီပေါနဲ့နမ္မတူ မြို့တို့ကို လေကြောင်းကနေ ဗုံးကြဲတိုက်ခိုက်သွားတာဖြစ်ပြီး မုံရွာနဲ့ချောင်းဦးအစပ် ဗုံတိုရွာကို စစ်အုပ်စုပါရာမော်တာနဲ့ကြဲချတာကြောင့် ပြည်သူ ၄၀ ကျော် သေဆုံးခဲ့သလို ထိခိုက်ဒဏ်ရာရသူလည်း လေးဆယ်ထက်မနည်း ရှိပါတယ်။
စစ်အုပ်စုက မုံရွာမြို့ပေါ်၊မန္တလေးနဲ့ရန်ကုန်မြို့တွေမှာ သီတင်းကျွတ်ပျော်ပွဲရွှင်ပွဲတွေ ပြုလုပ်ပေးနေပြီး တော်လှန်ရေးတပ်တွေ ထိန်းချုပ်တဲ့နယ်မြေတွေကိုတော့ သီတင်းကျွတ်လပြည့်ညမှာ ဗုံးကြဲခဲ့တာကြောင့် ပြည်သူတွေ သေဆုံးခဲ့ရတာ ဖြစ်ပါတယ်။
စစ်အုပ်စုအနေနဲ့ လေကြောင်းကနေ ဗုံးကြဲပြီး အစုလိုက်အပြုံလိုက် သတ်ဖြတ်နေတာက ပြည်သူကို အကြောက်တရားသွင်းနေတာလို့ အညာဒေသ တော်လှန်ရေးရဲဘော်တစ်ဦးက ပြောပါတယ်။
“စစ်ကောင်စီက လူမဆန်တာကတော့ ဒီလိုနေ့မှ မဟုတ်ဘူးပေါ့လေ နေ့စဉ်နဲ့အမျှ လူမဆန်စွာလုပ်နေတာပါ။ ဒီလိုနေ့ရက်တွေမှ ဆိုးရွားရက်စက်စွာ ဗုံးကြဲသတ်ဖြတ်တာက ဖော်ပြလို့မရအောင် ဆိုးရွားတဲ့ရက်စက်မှုတွေပေါ့ မြို့ပေါ်မှာတော့ လုပ်စေပြီး တော်လှန်ရေးနယ်မြေတွေကိုကျ အကြောက်တရားရိုက်သွင်းတာက နံပါတ်တစ်ပေါ့။ နံပတ်နှစ်က ဒါမျိုးတွေရှိလို့ ဖြစ်ရတာဆိုပြီး ပြည်သူလူထုက တော်လှန်ရေးကို မပါဝင်ရအောင် ပါဝင်ဖို့ ကြောက်သွားအောင် Mindset တွေ ရိုက်သွင်းချင်တာပါ။ ဒါပေမဲ့ အညာဒေသကလူတွေက ဒီထက်ပိုဆုံးရှုံးစရာမရှိတော့ဘူး ဆိုတော့လေ သူတို့ ဘယ်လိုမျိုး Mindset တွေ ရိုက်သွင်းသွင်း အညာဒေသကလူတွေအတွက် ဘာမှ သူတို့အပေါ်မှာ အမုန်းတရားနဲ့နာကျည်းချက်ကလွဲ ဘာမှရှိလာမှာ မဟုတ်တော့ဘူး”
သီတင်းကျွတ်လပြည့်ညမှာ မုံရွာနယ်နဲ့ချောင်းဦးနယ် အစပ်မှာ ပြုလုပ်တဲ့ ဆီးမီးသပိတ်ကို စက်တပ်လေထီးနဲ့ ၁၂၀ မမ ဗုံးသီးနှစ်လုံးကြဲချတိုက်ခိုက်တာကြောင့် ပြည်သူ ၄၀ ကျော်ထိသေဆုံးခဲ့ရပြီး ထိခိုက်ဒဏ်ရာရသူတွေလည်း များပြားတယ်လို့ ဆိုပါတယ်။
အလားတူ TNLA ထိန်းချုပ်ထားတဲ့ သီပေါနဲ့နမ္မတူမြို့တို့မှာလည်း မနေ့က စစ်အုပ်စုဗုံးကြဲသတ်ဖြတ်လို့ ပြည်သူ လေးဦးထိခိုက်ဒဏ်ရာရခဲ့ပြီး နေအိမ်အဆောက်အဦး ၆ လုံးခန့်လည်း ပြိုကျပျက်စီး ခဲ့ပါတယ်။
အဲဒီလိုပဲ စစ်အုပ်စုက မြိုင်မြို့နယ်တောင်ပိုင်းက တွင်းမ ပျူစောထီးကျေးရွာအနီးက စစ်ရှောင်ပြည်သူတွေကို ဦးတည်ပြီး Y-12 အမျိုးအစားလေယာဉ်နဲ့ ဗုံးသီးတွေ ကြဲချတိုက်ခိုက်ခဲ့ပေမဲ့ ယာခင်းပြင်ကို ကျရောက်ပေါက်ကွဲတာကြောင့် ပြည်သူအထိအခိုက်မရှိဘူးလို့ ဆိုပါတယ်။
ဂန့်ဂေါမြို့နယ် ဇဟောရွာကိုလည်း စစ်အုပ်စုတပ် ခလရ ၅၀ ကနေ လက်နက်ကြီးနဲ့ရမ်းသမ်းပစ်ခတ်တာကြောင့် ပြည်သူတစ်ဦးထိခိုက်ဒဏ်ရာရပြီး နွားတစ်ကောင်သေဆုံးခဲ့တယ်လို့ ဆိုပါတယ်။
Photo- Monywa Night King၊ မုံရွာချောင်းဦးနယ်အစပ်က ဆီမီးသပိတ် ဗုံးကြဲခံရပြီးနောက် ဒဏ်ရာရသူတွေကို မြင်တွေ့ရပုံ။
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
