အီသာရမ်/MFP ၊ နိုဝင်ဘာ – ၂၉
မကွေးတိုင်း၊ ပခုက္ကူခရိုင်၊ မြိုင်မြို့နယ်ထဲ ရွာစဉ်ပတ်မွှေ စစ်ကြောင်းထိုးတဲ့ စစ်အုပ်စုက ဒေသခံ စစ်ဘေးရှောင်ပြည်သူ အမျိုးသားတစ်ဦးကို ဖမ်းဆီးခေါ်ဆောင်သွားပြီးနောက် ညှဉ်းပန်းသတ်ဖြတ်ကာ အလောင်းကို လမ်းဘေးစွန့်ပစ်ခဲ့တယ်လို့ အညာမြေ အရပ်ဖက်လူမှုအဖွဲ့အစည်း-မြိုင် တာဝန်ရှိသူတစ်ဦး MFP ကို ပြောပါတယ်။
သေဆုံးသူဟာ မြိုင်နယ် ညောင်ရွာကျေးရွာက အသက် ၃၀ ကျော်အရွယ် အမျိုးသားတစ်ဦးဖြစ်ပြီး စစ်ရှောင်ထွက်ပြေးရင်း စစ်အုပ်စုရဲ့ ဖမ်းဆီးခံရကာ သတ်ဖြတ်ခံရတာလို့ ဆိုပါတယ်။
“တောတိုက်ထဲမှာ စစ်ရှောင်နေရင်းနဲ့ စက်မှု-၂ ကနေ ပြန်လာတဲ့စစ်ကြောင်းက ဖမ်းဆီးခံရတာပေါ့၊ သရက်ကန်(ရွာ)ကနေ တွင်းမ(ရွာ)ဘက်ဆီထွက်တဲ့ လမ်းက မြေရင့်ရွာနဲ့ နှမ်းဆီကန်ရွာအကြားမှာ သတ်ခံရတယ်လို့ ယူဆရတာပေါ့” လို့ အညာမြေအရပ်ဖက်လူမှုအဖွဲ့အစည်း-မြိုင် တာဝန်ရှိသူက ပြောပါတယ်။
အဲ့ဒီ စစ်အုပ်စုဟာ မြိုင်နဲ့ပေါက်နယ်အရှေ့ခြမ်းက ကျေးရွာတွေကို စစ်ကြောင်းထိုးကာ စီးနင်းလုယက် မီးရှို့နေတာ ဖြစ်ပြီး အထက်ပါ ပြည်သူကို သတ်ဖြတ်ခဲ့တဲ့နေရာရဲ့ တစ်မိုင်ခန့်အကွာမှာလည်း အောင်သာကျေးရွာဇာတိ ပျူစောထီးလို့ ယူဆရတဲ့ အမျိုးသားတစ်ဦးရဲ့ ရုပ်အလောင်းကိုလည်း တွေ့ရှိရတယ်လို့ ဆိုပါတယ်။
အဲဒီ ပျူစောထီးရဲ့ ရုပ်အလောင်းမှာလည်း ခြေထောက်ကို ကြိုးချည်ထားပြီး စစ်အုပ်စု အချင်းချင်း ညှင်းပန်းနှိက်စက် သတ်ဖြတ်ခဲ့တာ ဖြစ်မယ်လို့ အညာမြေအရပ်ဖက်လူမှုအဖွဲ့အစည်း-မြိုင် တာဝန်ရှိသူက ပြောပါတယ်။
အောင်သာကျေးရွာဟာ မင်းအောင်လှိုင်ကို သစ္စာခံကာ ပခုက္ကူနယ်ထဲ ပထမဆုံး လက်နက်ကိုင်တဲ့ ကျေးရွာ ဖြစ်ပြီး ၂၀၂၁ ခုနှစ်ကတည်းက ပျူစောထီးစခန်း ဖွင့်လှစ်ထားကာ လက်နက်အားကိုးနဲ့ ဒေသတွင်း ရွာမီးရှို့၊ လူသတ်၊ လုယက်၊ ပြည်သူတွေကို ဖမ်းဆီးကာ စစ်သင်တန်းပေးတာတွေ လုပ်ဆောင်နေတဲ့ ကျေးရွာ ဖြစ်ပါတယ်။
စစ်အုပ်စုဟာ ယခုရက်ပိုင်း ပခုက္ကူ၊ မြိုင်နဲ့ ပေါက်နယ်ထဲ အင်အားသုံး စစ်ကြောင်းထိုးကာ ရွာမီးရှို့၊ လူသတ်၊ လုယက်နေတာ ဖြစ်ပါတယ်။
မြိုင်နယ်က စစ်ရှောင်ပြည်သူတွေ/photo- အညာမြေအရပ်ဖက်လူမှုအဖွဲ့အစည်း-မြိုင်
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ ဝက်ဘ်ဆိုက်မှာလည်း ကြည့်နိုင်ပါတယ်။
