MN/MFP ၊ နိုဝင်ဘာ – ၆
စစ်ကိုင်းတိုင်း၊ ယင်းမာပင်ခရိုင် ဆားလင်းကြီးမြို့နယ်ထဲက ရွာတွေကို စစ်အုပ်စုတပ်က ပါရာမိုတာနဲ့ ဗုံးကြဲချခဲ့ချိန်မှာ မပေါက်ကွဲဘဲ ကျန်ရှိနေသေးတဲ့ ဗုံးသီးတွေကို တော်လှန်ရေးတပ်ဖွဲ့တွေက တူးဖော်ရှင်းလင်းပေးနေတယ်လို့ ချင်းတွင်းဒိုင်းနမိုက်တပ်ဖွဲ့ တာဝန်ရှိသူက MFP ကို ပြောပါတယ်။
မုံရွာအခြေစိုက် စစ်အုပ်စုရဲ့ အနောက်မြောက်တိုင်းစစ်ဌာနချုပ်(နမခ)ကနေ ဆားလင်းကြီးမြို့နယ်ထဲက ကျေးရွာတွေကို စက်တပ်လေထီးပါရာမိုတာတွေနဲ့ မကြာခဏ ဗုံးကြဲသတ်ဖြတ်နေရာမှာ မပေါက်ကွဲခဲ့တဲ့ ဗုံးသီးတွေ ကျန်ရှိနေတာဖြစ်ပါတယ်။
နိုဝင်ဘာ ၆ ရက် ဒီနေ့မှာ ကျေးရွာတစ်ရွာမှာ မပေါက်ကွဲဘဲ ကျန်ရှိနေသေးတဲ့ ဗုံးသီးနှစ်လုံးကို တော်လှန်ရေးတပ်ဖွဲ့တွေ တူးဖော်ရှင်းလင်းပေးနိုင်ခဲ့တယ်လို့ ချင်းတွင်းဒိုင်းနမိုက်တပ်ဖွဲ့ တာဝန်ရှိသူက ဆိုပါတယ်။
“ကျွန်တော်တို့ တတ်ကျွမ်းလို့ရယ်တော့ မဟုတ်ပါဘူးဗျ။ ပြည်သူတွေ ဒုက္ခရောက်မှာစိုးတာကြောင့် မဖြစ်မနေ တူးဖော်ရတာပါ။ ဒီလို မပေါက်ကွဲတဲ့ ဗုံးသီးတွေရှိနေတာကြောင့် သွားလာနေတဲ့ပြည်သူတွေနဲ့ ဆော့ကစားနေတဲ့ ကလေးငယ်တွေ ထိခိုက်နိုင်တယ်။ အခု တူးဖော်ရတဲ့ ဗုံးသီးတွေက ပေါင် ၂၅၀ တို့ ပေါင် ၃၀၀ တို့ရှိတဲ့ ဗုံးသီးတွေ ဖြစ်နေတာဆိုတော့ ကျွန်တော်တို့မှာ အတွေ့အကြုံမရှိဘဲနဲ့ ရအောင်တူးဖော်နေရတာပါ။ အခု တူးဖော်တဲ့အခါမှာ ပေါက်ကွဲနိုင်တာကြောင့် အနီးပတ်ဝန်းကျင်ကလူတွေကို တူးဖော်နေတဲ့အချိန်မှာ အဝေးကို တိမ်းရှောင်ခိုင်းထားရတယ်။ ပေါက်ကွဲခဲ့ရင်လည်း တူးဖော်တဲ့သူတွေရော အနီးနားကလူတွေပါ တစဆီဖြစ်သွားမှာ။ အဲဒီလိုပေါက်ကွဲခဲ့ရင် ဘေးမှာ မီတာ ၃၀၀ ကျော်နဲ့ ၄၀၀ အတွင်းမှာရှိနေရင် လွတ်မှာမဟုတ်ဘူးလေ။ ဒီကောင်တွေ(စစ်အုပ်စု)က အခုနောက်ပိုင်းတွေမှာ ရွာတွေထဲမှာ ဗုံးသီးချတာများတယ်။ အခုတခေါက်မှာ ရှစ်လုံးချတာ ခြောက်လုံးကွဲပြီးတော့ နှစ်လုံးမကွဲဘူး။ သူတို့ တခါတခါ ဗုံးသီးချရင် တစ်စီးကို လေးလုံးပါလာတာဆိုတော့ နှစ်စီးလာချရင် ရှစ်လုံးချသွားတာပေါ့။ အခုနောက်ပိုင်း ဗုံးသီးချတာတွေက ပေါင် ၂၀၀ ကျော်နဲ့ ၃၀၀ ကျော် ဗုံးသီးတွေ လာချနေတာ။ အခု ကျွန်တော်တို့ တူးဖော်ပေးနေရတာ စုစုပေါင်း သုံးလုံးရှိသွားပြီ”
ဆားလင်းကြီးမြို့နယ်ထဲမှာ စစ်အုပ်စုက စက်တပ်လေထီး ပါရာမိုတာနဲ့ ဗုံးကြဲရာမှာ တချို့ဗုံးသီးတွေက မပေါက်ကွဲဘဲ ကျေးရွာတွေနဲ့ အနီးဝန်းကျင်မှာ ကျန်ရှိနေတာဖြစ်ပါတယ်။ လက်ရှိမှာ တူးဖော်ထားတဲ့ ဗုံးသီးတွေထဲက ပြန်လည်အသုံးပြုလို့ရတဲ့ ဗုံးသီးတွေကိုတော့ စစ်အုပ်စုကို ပြန်လည်တိုက်ခိုက်ရာမှာ အသုံးပြုသွားမှာဖြစ်တယ်လို့ ချင်းတွင်းဒိုင်းနမိုက်တာဝန်ရှိသူက ဆိုပါတယ်။
မုံရွာမြို့နယ် အနောက်မြောက်တိုင်း စစ်ဌာနချုပ်ကနေ ဆားလင်းကြီးအပါဝင် ယင်းမာပင်၊ ပုလဲ၊ ကနီ၊ ဘုတလင်၊ အရာတော်၊ ဝက်လက်၊ ချောင်းဦး၊ မုံရွာ စတဲ့မြို့နယ်တွေထဲက ကျေးရွာတွေကို စက်တပ်လေထီး ပါရာမိုတာ၊ gyrocopter စတဲ့ စက်တပ်ယာဉ်တွေနဲ့ လေကြောင်းကနေ ဗုံးကြဲနေတာကြောင့် ဒေသခံတွေ မကြာခဏ သေဆုံးထိခိုက်တာတွေ ရရှိနေတာလည်း ဖြစ်ပါတယ်။
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
