MN/MFP ၊ နိုဝင်ဘာ – ၃
စစ်ကိုင်းတိုင်း၊ မုံရွာခရိုင်၊ ချောင်းဦးမြို့နယ်မှာ နိုဝင်ဘာလ ၂ ရက်နေ့ မနက်ပိုင်းမှာ စစ်အုပ်စုနဲ့ တော်လှန်ရေးပူးပေါင်းတပ်တွေ တိုက်ပွဲဖြစ်ပွားပြီး PDF ရဲဘော်တစ်ဦး ကျဆုံးကာ စစ်ကြောင်းမှူးအပါ နှစ်ဦး ထိခိုက်ဒဏ်ရာရရှိခဲ့တယ်လို့ ဒေသခံ တော်လှန်ရေးသတင်းရင်းမြစ်တွေက MFP ကို ပြောပါတယ်။
ချောင်းဦးမြို့အနီးက စစ်အုပ်စု အထိုင်ဂိတ်စခန်းကို တော်လှန်ရေးပူးပေါင်းတပ်ဖွဲ့တွေ ဝင်ရောက်တိုက်ခိုက်ရာမှာ အပြန်အလှန်ပစ်ခတ်မှု ဖြစ်ပွားခဲ့တာဖြစ်ပါတယ်။ တိုက်ပွဲအတွင်း စစ်အုပ်စုဘက်က ထိခိုက်တာတွေရှိပေမဲ့ အတိအကျမသိရသေးဘဲ တော်လှန်ရေးတပ်ဖွဲ့တွေဘက်ကတော့ တစ်ဦးကျဆုံးကာ နှစ်ဦးဒဏ်ရာရခဲ့တယ်လို့ အမည်မဖော်လိုတဲ့ စစ်ရေးနဲ့ နီးစပ်သူတစ်ဦးက ပြောပါတယ်။
“မနေ့က မနက် ၆ နာရီလောက်မှာ (စစ်အုပ်စု) စခန်းလေးခုရှိတဲ့အထဲမှာ အလယ်ကစခန်းကို ဝင်တိုက်တာ။ သူတို့ဘက်ကလည်း နှစ်ဖက်ညှပ်ပြီးတော့ ပြန်ပစ်တာ။ တိုက်ပွဲမှာ ရဲဘော်တစ်ဦး ကျတယ်။ ကျွန်တော်တို့အဖွဲ့ထဲက စစ်ကြောင်းမှူးလည်း ပြင်းထန်ဒဏ်ရာရခဲ့ပါတယ်။ ကျန်တဲ့အဖွဲ့က ရဲဘော်တစ်ဦးလည်း ထိခိုက်ဒဏ်ရာရခဲ့သေးတယ်”
မနေ့က တိုက်ပွဲဖြစ်ပွားနေချိန်မှာလည်း ချောင်းဦးမြို့ပေါ်မှာရှိနေတဲ့ စစ်အုပ်စုအထိုင်စခန်းတွေကနေ အနီးဝန်းကျင်ကို လက်နက်ကြီးတွေနဲ့ ရမ်းသမ်းပစ်ခတ်ခဲ့တာကြောင့် ငါးလုံးတင်ကျေးရွာထဲ လက်နက်ကြီးကျရောက်ပေါက်ကွဲကာ အသက် ၁၀ နှစ်ကျော်အရွယ် မိန်းကလေးငယ်နှစ်ဦး သေဆုံးပြီး နေအိမ်တွေထိခိုက် ပျက်စီးသွားတယ်လို့ ဒေသခံတော်လှန်ရေးသတင်းရင်းမြစ်တစ်ဦးက ဆက်ပြောပါတယ်။
“သူတို့ဘက်က လက်နက်ကြီးနဲ့ ရွာတွေဘက်ကို ရမ်းသမ်းပစ်လို့ လက်နက်ကြီးကျပြီးတော့ အသက် ၁၀ နှစ်ကျော်အရွယ် မိန်းကလေးနှစ်ယောက်က တစ်စစီဖြစ်သွားတာ အလောင်းကိုကောက်လို့မရတော့ဘူး။ နောက်ထပ် တစ်ယောက်ကလည်း ပခုံးပြတ်ထွက်သွားတာ”
စစ်အုပ်စုစခန်း တိုက်ခိုက်ခံရပြီးနောက် လက်နက်ကြီးတွေ ပြနလည်ပစ်ခတ်တာနဲ့ တော်လှန်ရေးတပ်ဖွဲ့တွေကို နှစ်ဖက်ညှပ်တိုက်ခိုက်ခံနေရပြီး ထိခိုက်ကျဆုံးမှုတွေပါရှိလာတာကြောင့် ပြန်လည်ဆုတ်ခွာလာခဲ့ရတယ်လို့လည်း ဒေသခံသတင်းရင်းမြစ်တွေက ဆိုပါတယ်။
ချောင်းဦးမြို့နယ်ထဲမှာ စစ်အုပ်စုက ဂိတ်စခန်းဖွင့်ပြီး ဒေသခံတွေနဲ့ခရီးသွားပြည်သူတွေကို ဖမ်းဆီးငွေညှစ်တာ၊ ပေါ်တာဆွဲဖမ်းဆီးတာနဲ့ မိုင်းရှင်းခိုင်းတာတွေ လုပ်ဆောင်နေတာဖြစ်သလို တိုက်ပွဲမဖြစ်တဲ့ ကျေးရွာတွေကိုပါ လက်နက်ကြီးတွေနဲ့ ရမ်းသမ်းပစ်ခတ်နေတာကြောင့် အရပ်သားတွေ မကြာခဏ ထိခိုက်သေဆုံးတာတွေ ရှိနေတယ်လို့ ဒေသခံတွေကပြောဆိုထားပါတယ်။
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
