နွေဦး/MFP၊ ဇန်နဝါရီ – ၁၆
စစ်ကိုင်းတိုင်း၊ စစ်ကိုင်းမြို့နယ်အထွက်က မုံရွာ-မန္တလေးလမ်းမပေါ်က စစ်အုပ်စုတပ်စွဲကာ ခရီးသည်တွေကို တောင်းကြမ်းနေတဲ့ စစ်ကိုင်းကံတလူတိုးဂိတ်ကို တော်လှန်ရေးအင်အားစုတွေက ဇန်နဝ်ရီလ ၁၅ ရက်ညပိုင်းမှာ တိုက်ခိုက်သိမ်းပိုက်ခဲ့တယ်လို့ Sagaing PDFက ဒီနေ့ထုတ်ပြန်ပါတယ်။
ပြည်သူလူထုကို နေ့စဉ်ဒုက္ခပေးနေတဲ့ ကံတလူတိုးဂိတ်ကို တော်လှန်ရေးအင်အားစုတွေက ဝင်ရောက်ပစ်ခတ် စီးနင်းရာမှာ စစ်အုပ်စုတပ်သားတွေဟာ အထိအခိုက်များတာြကောင့် စစ်ကိုင်းမြို့ဘက်ကို ဆုတ်ခွာထွက်ပြေးသွားတယ်လို့ ဆိုပါတယ်။
တိုက်ခိုက်သိမ်းပိုက်ထားစဉ်မှာ စစ်အုပ်စုကင်းစင်သွားတဲ့ ကံတလူတိုးဂိတ်အတွင်းက စစ်အုပ်စုတပ်စွဲထားတဲ့ အဆောက်အဦးတွေကို ဗုံးခွဲဖျက်ဆီးခဲ့တယ်လို့ ထုတ်ပြန်ချက်မှာ တွေ့ရပါတယ်။
အဲဒီတိုက်ပွဲမှာ Sagaing PDFက စစ်သည်ရဲမေတွေ ပါဝင်ခဲ့ပြီး SAGAING PDF (စစ်ကိုင်းစစ်ကြောင်း)၊ လင်းယုန်ညီနောင်ပြောက်ကျားတပ်ဖွဲ့နဲ့ စစ်ကိုင်းမြို့နယ်ပကဖတို့က ပူးပေါင်းပါဝင်ခဲ့တာ ဖြစ်ပါတယ်။
တစ်ဆက်ထဲမှာပဲ SAGAING PDF အနေနဲ့ မိုးကုတ်-မိုးမိတ်ဒေသတွေမှာ Operation- 677 စစ်ဆင်ရေးဖော်ဆောင်ကာ အမျိုးသားညီညွှတ်ရေးအစိုးရ၊ ကာကွယ်ရေး၀န်ကြီးဌာန လက်အောက်ခံတပ်တွေနဲ့ အတူတကွ ပူးတွဲတိုက်ပွဲ၀င်နေတယ်လို့ ထုတ်ပြန်ချက်ကတဆင့် အသိပေးထားပါတယ်။
ဓာတ်ပုံ – Sagaing PDF
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
